Eduki publikatzailea

Simón de Anda y Salazar arabarrak Filipinen defentsa egin zueneko alegoria. 1762-1763

Mihisearen goiko aldean, Simón de Anda y Salazarren (Subilla Gasteiz, 1709 - Cavite, Filipinak, 1776) erretratua ageri da, eta Filipinetako maparen inguruan hainbat eszena zenbakitu, 1762tik 1763ra bitartean britainiarren okupazioan zehar gertatutako ekintza eta jazoera belikoak kontatzen dituztenak. Ordenan jarrita daude erdialdeko kartela batean.

 

 

Gasteizen eta Sigüenzan ikasi ondoren, Simón de Andak Alcalá de Henaresko Unibertsitatean legeen arloko doktoregoa egin zuen. Madrilen lanean aritu ondoren, Manilako audientzian entzule izendatu zuten, eta bertara joan zen 1755ean; karguan zegoela, britainiarrek 1762an hiria hartu zuten. Desgobernu egoeraren aurrean, Andak artxipelagoaren defentsa arrakasta handiz antolatu zuen, natiboek, espainiarrek eta espainiar berriek (mexikarrek) osatutako tropekin.

 

 

1765ean Espainiara itzuli zen; ohore handiko harrera jaso zuen eta Karlos III.ak Gaztelako kontseilari izendatu zuen. 1767an jabetu zen karguaz. Ondoren audientziako presidente, gobernadore eta Filipinetako kapitain nagusia izan zen 1769tik 1776ra; kargu horretan izan zen zendu arte. Karlos III.aren ordenako gurutzea lortu zuen 1772an, eta kondekorazio hori dauka bularrean jarrita obra honetan; litekeena da hura izan izana oroitzapenezko mihise handi hau egiteko arrazoietako bat.

Lan honen egilea ezezaguna da, eta Ricardo Augustinek (1875-1965) eman zion dohaintzan Arabako Foru Aldundiari. Ricardo Augustin abokatua, jatorriz Madrilgoa eta amaren aldetik Simón de Andaren ondorengoa, izan zen Augustin Zulueta jauregiaren jabea, emazte Elvira Zulueta (1871-1917) arabarrarekin batera. Jauregia 1912an eraiki zuten Gasteizen, eta Arabako Arte Ederren Museoaren egoitza da gaur egun. Margolanaren eta etxean zeuden beste obra, altzari eta objektu batzuen dohaintza 1941ean egin zen, jauregia Arabako Aldundiari saldu zitzaionean.

1772 baino geroagokoa

Mihise gaineko olioa
236 x 335 cm

[Zk. 50]