Eduki publikatzailea

Kutxa gorria edo Ogi saltzailea

Antonio Ortiz Echagüe bere izaera kosmopolita eta ibiltariak nabarmendu zuen gainerako artista garaikideetatik. Atsedenik hartu gabe bidaiatu zuen eta hainbat herrialdetan ibili zen, beti berta-bertakoak ziren gai eta elementuak zeuden herri eta agertokien bila. Honako hauek ziren bere estiloaren ezaugarriak: marrazki mardulak, pintzelkada lodiak eta argiaren eta kolorearen erabilera ikusgarria.

 

 

1929an Marokora joan zen adiskide batek aholkatuta, eta bisita hark liluratu egin zuen artista, herrialdeari zerizkion koloreak eta exotismoa zirela eta. Bizileku hartu zuen, eta han bizi izan zen 1931 arte. Garai hartakoa da obra hau, Fezen zuen estudioan margotua. Hango meskitan jarri zuen ikusgai Echagüek, garai eta gai bertsuko bere beste lan batzuekin batera.

 

 

Marokoko azoketan ohikoa den eszena irudikatu du: emakume ogi saltzailea salgaiak kalean eskaintzen; ilunabarrean, kerosenozko lanpara batek argitzen du saltokia, eta emakumearen itzal geometrikoa horman proiektatzen. Saltzailearen aurretik igarotzen den gizon arabiarrak, txilaba luze iluna soinean duela, kutxa bat darama buru gainean. Emaztegai marokoarrek halako kutxetan gordetzen zituzten beren bitxiak eta ondasunik preziatuenak, eta ezkontza egunean senargaiaren etxera eramaten zuen eztei segizioko kideetakoren batek. Haren atzean, saltzailearen oso antzeko arropa daraman neska gazte arabiar batek osatzen du hirukotea, eta konposizioa aberasten.

Antonio Ortiz Echagüe (Guadalajara, 1883 - Buenos Aires, 1942)

Mihise gaineko olioa
215 x 176 cm

[Zk. 2049]