Eduki publikatzailea

Dolores Ibáñez de Aldecoaren bustoa

Nemesio Mogrobejok (1875-1910) euskal eskulturaren korronte moderno deiturikoa ordezkatzen du. Hogeita hamabost urterekin izandako heriotza goiztiarraren ondorioz ibilbide garrantzitsua eten zaion artistaren adibide argia da.

Mogrobejok Bilbon jaso zuen bere lehenengo prestakuntza artistikoa, Federico Saenzen lantegian eta Arte eta Lanbide Eskolan, eta Anselmo Guinea margolariaren marrazketa eta modelaketa eskolak jaso zituen han. 1894an, Bizkaiko Aldundiaren pentsioa jaso zuen eta Parisera joan zen bizitzera. Han, eskultura klasikoaren berri izan zuen, Julian akademiako eskoletara joan zen eta Paco Durrio eskultorearen lantegian lan egin zuen. Han ezagutu zuen bere ematea izango zena: Paula Scheneck, Austriako artista bat; sekulako sentikortasuna zuen, eta eragin handia izan zuen Mogrobejorengan. Paularen eta semearen heriotzak tristura sakona eragin zion artistari, eta ibilbide artistikoan aldaketa handia: artea, giza sentimenduaren irudikapen sinboliko gisa ikusten hasi zen. Italiara joan zen Bizkaiko Aldundiaren pentsio bati esker, baina handik gutxira tuberkulosiak jo zuen eta Gratz-en (Austria) hil zen 1910ean.

 

 

Arabako Arte Ederren Museoaren bildumakoa da Dolores Ibáñez Aldecoaren bustoa lana. Artistaren etapa modernistan egina da, eta 1897ko data darama (Pariseko egonaldia). Julián Ibáñez Aldecoa margolariaren arreba irudikatzen du, eta patinadun igeltsuz dago eginda. Modelatu leuna eman dio, bereziki aurpegiari. Ez, ordea, lepo aldeari eta arropari: mugimendu uhindua ematea lortu du azken horiei. Nabarmentzekoak dira, halaber, piezaren oinarrian ikusten diren erreferentzia organikoak.

Nemesio Mogrobejo (Bilbo, 1875 - Graz, Austria, 1910)

Patinadun igeltsu berdea
72 x 47 x 30 cm

 

[Zk. 3011]