PD_001_Errege baten haurtzaroa - arteederrenmuseoa

Darío de Regoyos Ribadesellan (Asturias) jaio zen 1857an, baina bizitzan zehar lotura estua izan zuen Euskal Herriarekin, eta Euskal Herriko jendea eta, batez ere, paisaiak eta bazterrak bere koadroetako protagonista egin zituen.

Margolari prestakuntza Madrilen jaso zuen, baina erabakigarria izan zen Belgikan egin zuen egonaldia. Izan ere, han, erabat murgildu zen Europako kultura abangoardian. Darío de Regoyos modernitatearen sustatzailea izan zen eta inpresionismoa sartu zuen XIX. mendearen amaierako eta XX. mendearen hasierako euskal eta espainiar pinturan.

Bidaiari nekaezina izan zen, eta maiz aldatu zuen bizilekua. Euskal geografiako hainbat lekutan bizi izan zen, hala nola Donostian, Bilbon, Irunen, Hernanin, Durangon eta Areetan, eta leku horietan guztietan bere margolanetarako gaiak aurkitu zituen.

Artista honen lehenengo margolanetan, “naturalismo espresionistara” hurbildu zen, Goyaren oinordeko gisa. Belgikan bizi izan zuen esperientziaren ostean, inpresionismoan murgildu zen, eta obra batzuetan dibisionismora iritsi zen.

Lan honetan, Ondarretako hondartzaren ikuspegia erakusten digu. 1888. urterako, margolaria sarri joaten zen Donostiara, baina 1890ean joan zen hara bizitzera. Askotan margotu zituen Donostiako hondartzak edo Kontxako pasealekua.

Oraingo honetan, itsasoa bare erakusten digu; figura batzuk hondarretan eta, atzealdean, Igeldo mendiaren eta Santa Klara uhartearen siluetak. Eszenak monarkiaren paseo lasaia deskribatzen du, Alfontso XIII.a infantearena eta bere ama Maria Kristina erreginaordearena, “olatu bainuak” deritzenak hartzean euren intimitatea babesteko erabiltzen zuten etxolaren alboan. Jauregitxo mugikorra zen, eta 60 metroko bi errail irristakorren gainean mugitzen zen, lurrunezko motor bati esker.