Amba. Solasaldiak arte ederren museoan - Antonio Ortiz Echagüe: El pintor y su obra - arteederrenmuseoa

Antonio Ortiz Echagüe izan da Arabari lotutako artistarik nazioartekoena eta sarituena. Margolari akademizista izan zen, Zuloagaren errealismoaren eta Sorollaren luminismoaren eragina zuena. Kosmopolitismoak herrialde asko bisitatzera eta bere mihisetan beste kultura batzuk islatzera eraman zuen. Fezen egon zen bitartean, "Kutxa gorria" koadroa egin zuen, gure museoko margolanik miresgarrienetakoa.

Montserrat Fornells Artearen Historiako katedradunak margolari horri buruzko doktore tesia aurkeztu zuen 1991n. Irudietan oinarrituta eskainiko duen hitzaldian, dena jakin ahal izango dugu Ortiz Echagüek izandako bizitza eta artelanaz, bai eta haren alderdi bidaiariaz, ondare artistiko zabalaz eta Montserratek berak museorako haren koadroetako batzuk erosten parte hartu izanaz ere.

Hitzaldiaren ostean, solasaldi bat izango dugu hizlariarekin eta azalpen osagarri bat haren koadro adierazgarrienaren aurrean.